Klinikken har to avdelingar: Avdeling for fysikalsk medisin og rehabilitering på Nordås i Fana og Habiliteringstenesta for vaksne som held til på Breistein i Åsane.
Regionalt kompetansesenter for habilitering og rehabilitering i Helse Vest er og ein del av ReHabiliteringsklinikken.
Habilitering handlar om samla innsats for betring av funksjonsevne, helse og livskvalitet hos personar med medfødt eller tidleg erverva sjukdom eller skade. Habiliteringstenesta for vaksne (HAVO) gir helsetenester til pasientar/ brukarar over 18 år, som treng spesialisert habilitering.
Rehabilitering handlar om samla innsats for betring av funksjonsevne, helse og livskvalitet for personar som har fått ein sjukdom eller ein skade seinare i livet. Avdeling for fysikalsk medisin og rehabilitering (AFMR) gir spesialiserte tilbod og tenester til personar som har samansette rehabiliteringsbehov.
Habilitering og rehabilitering er prosessar som krev samhandling mellom ulike tenester. Vi legg derfor stor vekt på samarbeid med tenester og tilbod i kommunane, samtidig som vi har ei tverrfagleg arbeidsform der dei ulike yrkesgruppene bidrar i forhold til dei individuelle behova til pasientane.
Historikk:
Da staten overtok ansvaret for spesialisthelsetenesta frå 01.01.02 vedtok styret for Helse Bergen i desember same året at Nordåstunet (som var ein fylkeskommunal institusjon) skulle bli integrert i Avdeling for fysikalsk medisin og rehabilitering. Helse Bergen HF gjorde ved årsskiftet 2002/2003 igjen ei omorganisering. Då blei Avdeling for fysikalsk medisin og rehabilitering organisert saman med Habiliteringstenesta for vaksne funksjonshemma på Breistein i ReHabiliteringsklinikken.