Sommarjobb på Haukeland

Foto: colourbox.com

Med sommarferie kjem behovet for sommarvikarar, også ved Haukeland universitetssjukehus.

Det er eit stort behov for vikarar frå mai og ut august innan mange av våre fagområde. For å få draumejobben hos oss er det berre å følgje med frå januar til påske.

Bemanningssenteret er aktive bidragsytarar til at vi får dekka vårt vikarbehov om sommaren. Ta gjerne kontakt med dei dersom du ønskjer jobb hos oss.

Er du helsefagstudent? Då kan ein sommarjobb på Haukeland universitetssjukehus vere ein fin måte å prøve ut sjukehus som arbeidsplass på og samstundes vise kva du er god til. Den beste måten å halde seg oppdatert på, er å følgje med på utlyste stillingar merka med sommarvikar.

Ledige stillinger akkurat no - Sjå oversikt

Sommarvikarane


"Kjem heilt klart tilbake" Erik, Portør	"Blant spreke kvinner på Askøy" Anne Lise, miljøarbeidar	"Vaktar sjukehuset" Erik, vekter	"Kjekt å gjere noko anna enn elles" Lina, masterstudent

"Eg trur eg blir ein betre lege av å jobbe her" Maartje, pleieassistent	"Eg jaktar på nye impulsar" Anna, intenstiv-sjukepleiar	"Eg blir lommekjent på Haukeland" Alexander, portør	"Eg skal halde sjukehuset plettfritt" Anna, reinhalds-assistent

Korleis få sommarjobb på Haukeland?

– Det kan vere avgjerande å ha ei god referanse frå sommarjobben i den neste stillinga du søkjer, seier leiar av Bemanningssenteret på Haukeland universitetssjukehus, Britt Velsvik.

Britt Velsvik

På ein så stor og spennande arbeidsplass som Haukeland er det stort spenn av yrker, men felles for alle arbeidstakarar er eit ønskje om positive, flinke og arbeidsvillige sommarvikarar.

– Her er moglegheiter for studentar innan helsefag eller anna relevant utdanning å starte sin karriere i organisasjonen. I tillegg har vi fleire sommarjobbar utan krav til kompetanse, seier bemanningssjefen på eit av vestlandets største arbeidsplassar.

Ho debuterte sjølv som sommarvikar då ho var 18 år på Hotell Alexandra i Loen, og lærte fort at det var viktig å gjere sitt beste for å få gjestane til å trivast.

– Sidan blei eg utdanna sjukepleiar og arbeidde på Haukeland som det frå 1983. Då tok eg ein pause og hamna i bemanningsbransjen i nokre år - før eg no har vore leiar av Bemanningssenteret her på huset sidan 2006. Det var ein god mogelegheit for meg å kombinere erfaringane mine som sjukepleiar og avdelingssjukepleiar med kompetansen frå bemanningsbransjen, fortel ho.

Gode tips frå eksperten til korleis komme gjennom nålauget, er først og fremst å bruke tid på å skrive ein god søknad i tillegg til cv.

– Når vi får mange søkjarar med lik kompetanse, vil leiar kunne bruke søknaden til å skilje søkarane frå kvarandre før du blir innkalla til intervju. Då må du ta med deg originale attester og vitnemål til intervjuet. I tillegg bør du oppsøkje informasjon om den eininga du har søkt på, slik at de får eit inntrykk av at du er godt førebudd, understreker Velsvik.

Frå portør til direktør

Personal-og organisasjonsdirektør Trond Søreide kan ikkje garantere at alle sommarjobbar ved Haukeland universitetssjukehus endar i ein direktørstol, men sjølv starta han sjukehuskarrieren som portør.

– Eg fekk prøve meg på mykje forskjellig, og lærte verkeleg sjukehuset å kjenne, seier Søreide.

Til saman var han sommarvikar i fem år, innan dei fleste område av portøryrket. Og det var ikkje berre spennande der og då, men har også vore nyttig i jobben han har no.
– Eg lærte mykje om korleis ting fungerer i organisasjonen, og kor ting er på sjukehuset. Ikkje minst gav det eit unikt innblikk i arbeidskvardagen på dei ulike avdelingane på Haukeland.
Søreide trur ikkje han er åleine om å oppdage at ein sommarjobb på Haukeland gir meirsmak.

– På Haukeland får du verkeleg teste korleis arbeidslivet er i ein stor organisasjon. Og for dei som er under utdanning er dette ein unik sjanse til å prøve ut kompetansen sin. Vi har eit stort mangfald og vidt spenn, med veldig mange moglegheiter. Samtidig har vi mange spennande vikariat der ein ikkje treng spesiell kompetanse eller utdanning. Her er noko for ein kvar smak, understrekar personal- og organisasjonsdirektøren.

Han påpeikar òg at sams for alle stillingar, uansett krav til faglege kvalifikasjonar, er at sjukehuset jaktar på flinke, positive og engasjerte sommarvikarar.

Kontakt | Nettstedskart