Ny likemannsteneste for kreftpasientar 

Henrik Aasved vil bruke tid på å hjelpe andre som er ramma av kreftsjukdom

– Eg sakna eit likemannstilbod då eg var pasient. Sidan har eg engasjert meg i Lungekreftforeningen, mellom anna som likemann fordi eg ønskjer å hjelpe andre som er ramma av kreft. Det er ein vanskeleg tid og eg veit at det er eit stort behov for oss både blant pasientar og pårørande, seier han.

Endeleg!
Seksjonsleiar på Avdeling for kreftbehandling og medisinsk fysikk, Siv M. Årdal, stadfestar dette.

– Vi får mange tilbakemeldingar frå pasientane våre om at dei ønskjer å snakke med andre som har vore gjennom det same. No har vi endeleg fått eit likemannstilbod til denne pasientgruppa og vi ser på tilbodet som ein del av den heilskapelege kreftomsorga på sjukehuset, seier ho.

Låg terskel
Aasved veit kor godt det kan vere å få snakke med nokon som veit kva det vil seie å vere alvorleg kreftsjuk, men likevel leve eit godt liv tross sjukdom og behandling.

– Dette er eit tilbod til dei sjuke som sjukehuset ikkje kan dekkje. Det er her vi i pasientorganisasjonane kjem inn. I samarbeid med Kreftforeningen og Haukeland har vi fått på plass eit opplegg som vi håper mange vil nytte seg av, påpeikar han.

– Om du berre lurer på noko eller treng nokon som lyttar til deg – det finst ikkje ein for liten grunn til å oppsøkje oss. Vi gjør alt vi kan for å møte deg ut frå dine behov sjølv om vi har våre eigne erfaringar. Det viktigaste er at det skal vere låg terskel for å ta kontakt.